نصائح مطبخية متنوعة

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
- وانتي بتسوي الأكل سويه علي نار هادية هيفرق جدا معاكي في الطعم يعني بمجرد أنه يغلي هدي النار و غطي الحلة وسيبي الأكل يستوي براحته

2 - خلي بالك وانتي بتحطي البهارات عشان كل أكله وليها بهاراتها المخصوصه مثلا الكمون مينفعش تحطيه مع اللحمه العصاج دائما حطي البهار المناسب للوصفة والكمية المناسبة بدون مبالغة عشان متفقديش الطعم الأصلي و اللذيذ للطبق .

3 - جربي حطي ملعقة صغيرة سكر للملوخية و البسلة و الرز بالبصل هيديها طعم رائع وكمان هيظهر الطعم

4 - وانتي بتعملي الرز بالشعرية دايما حطي الشعرية نصف مقدار الرز عشان تديكي طعم لذيذ زي بتاع المطاعم وعصير نص ليمونة يطلع مفرفر

5 - إدعكي بصل السلطة الخضراء بملح وفلفل أسود و ليمون وسيبيه علي جنب ولما تيجي تقدميه حطيه مع باقي المكونات ليه بقي ؟ عشان بيكسر حدة طعم البصل و يقضي علي رائحته الغير مستحبة بالفم

6 - عايزة السلطة الخضراء بتاعتك تبقي زي بتاعت المطاعم ضيفي شرائح بصل ، كزبرة جافة ، ملح ، ليمون ، خل ، كمون ، كزبرة خضراء و بقدونس و شبت بجانب الطماطم و الخيار و أي خضار تاني انتي عايزة تزوديه.

7 - اوعي تسيبي صلصة الكشري تتسبك كتير هما مجرد غلوتين للحصول علي القوام المضبوط وبس عشان طعمها ميغيرش

8 - بصل الكشري البني قبل ما تحميره حطيه في ملعقة دقيق وملعقة نشا نفضي الدقيق الزائد و اقليه لغاية متوصلي للون اللي عايزاه وكده مش هيشرب زيت وهيقرمش

9 - وانتي بتسلقي الفراخ والأرانب شوحيها الأول في السمن السخنة يعني صدمة مع شوية من المستكة و الحبهان وورق اللورا و الفلفل الأسمر الحب كويس والبصل والطماطم وبعدين صبي عليها مياه مغليه وليست باردة

10 - وانتي بتشتري البهارات اشتريها حبوب و نقيها وبعدين اطحنيها و بالنسبة للكزبرة و الكمون حمصيهم الأول علي النار قبل ما تطحنيهم وشوفي فرق الطعم بنفسك

11 - اعجني المعجنات و المخبوزات باللبن الرايب و شوفي بقي هيخلي العجينة ازاي هشة و طرية و لذيذة وكلي منها وادعيلي

12 - عايزه ستيك اللحم زي المطعم بالظبط تبليه بملح و فلفل بس بدون أي اضافات
 
التعديل الأخير:

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
زيت الزيتون ممكن نحط معاه سمنة او زبدة طبيعى انما ممنوع تماما اضافة نوع زيت اخر مع زيت الزيتون

البشاميل لما تقلبى الدقيق فى السمنة اول لما يتجانسوا مع بعض ويعملو عجينة لينة سايحة كده انزلى باللبن كله مره واحدة عمره ما هيكلكع منك ومتستنيش لما الدقيق ياخد لون جامد هيبقى طعمه مش حلو لازم يبقى لونه دهبى فاتح جميل

صلصه المكرونة عشان تبقى سايحة زى بتاعه المطاعم متسبكيش الطماطم اوى سبيكيها ٣/٤ تسبيكة عشان متلزقش فى المكرونة واعمليه بالزيت والبصل ونكهى البصل بالفلفل الاسود قبل ما تحطى الطماطم

محشى ورق العنب اسلقيه بمايه و ليمون واعصرى ليمون عليه قبل ما تسويه ورشه زيت زيتون على الوش عشان يدى لمعة فى المحشى وحطى فلفل رومى متقطع على الوش بيدى طعم حلو اوى مع ورق العنب ويسلام لو حامى

الممبار حطيله نعناع

الكرنب اسلقيه بكمون حب

الباذنجان احشى معاه فلفل رومى وفلفل حامى بيليقوا على بعض ولما يستوا مع بعض فى نفس الحلة بيخلى طعم المحشى جميل

محشى الكوسة الى بتقوريه منها حطيه تانى فى الخلطة اوعى ترميه او حطيه في قعر الحلة ميخليهاش تشيط

خلطه المحشى عموما كترى البصل والخضرة والطماطم وخلى الرز نص مقدارهم عشان كده كده الرز بعد السواء بيبقى الضعف عشان متلقيش فى الاخر المحشى عباره عن رز بس الى باين بعد ما يستوى

طلعى الجبنة الموتزريلا من بدرى اوى تفك خالص قبل ما تستخدميها على البيتزا ويااريت تضربيها فى الكبه مع الجبنة الشيدر هتسيح كويس جدا وطعم تحفة من ميكس الشيدر والموتزريلا مع بعض

صلصة البيتزا
اضربى الطماطم مع فصين توم وحته صغيره فلفل اخضر رومى او احمر حطى فى الحله زيت زيتون
وزعتر وريحان مجفف وشوحيهم وانزلى بالعصير وسبيه يتسبك وطبعا حطى ملح وفلفل وسكر ومعلقه خل

الرز عشان يطلع مفلفل وبيلمع وجميل اعمليه بسمنه وزيت مع بعض .والرز الابيض ضيفي له ملعقة خل هتشوفى بياض محصلش

الملوخية متغطيهاش عشان متغمقش منك وضيفى الشوربه كبشه كبشه واقلبى بمضرب بيض يدوى لغايه ما توصلى للسمك الى انتى عايزاه عمرها ما هتسقط منك

لو هتعملى بسكويت خاصه الكوكيز اعملي العجينة وسبيها متغطية فى التلاجة من يوم لخمس ايام اكنها بتتبل كل ما تسبيها كل ما طعمها يبقى احلى ده سر من اسرار المحلات الكبيرة بره

الكوكيز اعملى كمية و كوريها وحطيها فى صنيه ودخليها الفريزر وبعد كده جمعيها فى كيس فى الفريزر كل شوية طلعى منه واخبزى طازة بطازة ممكن يقعد لحد ١٢ اسبوع فى الفريزر

الدهون الحيوانية أفيد بكتير من النباتية اياكى واستعمال السمنة او الزبدة النباتى ربنا خلق الدهون الحيوانية ليها فايدة كبيرة لجسم الانسان بعكس ما بيقولوا .بس بدون اسراف

استعملى زيت الزيتون المخصص للطبخ مش هقول مفيش منه ضرر بس فيه فايدة عن الزيت العادي​
 
التعديل الأخير:

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
معلومـات فـى الطبخ .. ♥
١- تبلي دقيق #السمك ب (ملح وفلفل وكمون وشطة ونشا وبيكنج بودر) قبل القلي ♥
٢- العيش الفينو قبل ماتعمليه سندوتشات شيلي القلب واقطعي الحروف وحمصيهم
واطحنيهم ضيفي عليهم( توم بودر وبصل بودر وبابريكا وملح وفلفل ونشا وبيكنج بودر )
ل لبانيه والفراخ المقرمشة ♥
٣- الباذنجان المخلل ضيفي نعناع ناشف مع التوم ♥
٤- ضيفى ملعقة سكر في صلصة المكرونة ♥
٥- البطاطس قبل ماتحمريها اسلقيها عشر دقائق في ميه وملح هتلاقيها بتقرمش ومش بتشرب زيت ♥
٦- ضيفى رشة لبن بودرة علي وش البشاميل ♥
٧- ضيفى ملعقة خل في الكيك هيخليه هش وطرى ♥
٨- ضيفى معلقه عسل اسمر في تتبيلة الفراخ المشوية ♥
٩- ضيفى كوب زبادي في تتبيلة البانيه ♥
١٠- حطى ملعقة بيكنج بودر في الشوربة اللي هتسقي فيها الرقاق ب اللحمه هيبقي مقرمش ومورق معاكى ♥
١١- ضيفى ل الرز ب اللبن كيس كريم شانتيه ♥
١٢- ضيفى رشة زعتر علي صلصة المكرونة ،، هتديكي ريحه طيبه ♥
١٣- ل احلي صلصة مكرونة اضربي مع الطماطم ( توم وفلفل رومي وفلفل حامي ) ♥
١٤- إدهني الفراخ والبط واي زفر عمومآ ب (كاتشب وملح وفلفل وقرفة ) قبل ما تدخليها الفرن ♥

١٥- بعد ما تطبخى الرز البسمتي اكشفي الغطا من عليه عشان ميعجنش ♥
١٦- حطى معلقه بيكينج بودر مع اللمون وانتي بتسلقيه عشان يحافظ علي لونه ♥
١٧- وانتي بتقلي البانيه حطي ملعقة زبدة مع الزيت هيبقي طعمه تحفه ♥
١٨-لما تيجي تعملي عجينة كريب حطي تلتين الكوبايه دقيق والتلت نشا هيطلع مقرمش زي بتاع المحلات بالضبط♥
 
التعديل الأخير:

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
FB_IMG_1661308031171.jpg

🍠🍠 - البطاطا المشوية اعمليها في الكيس الحراري ورشي عليها سكر وندخلها الفرن هتستوى اسرع وهتبقى حلوة .

🧀🧀عشان تبشرى أى نوع جبنه فى المبشره ادهنى المبشره زيت قبل الإستخدام مش هتلزق الجبنه فيها

🥛🥛الجبنه القريش اضربيهم فى الخلاط مع شويه لبن وملعقتين زيت وملعقه قشطه هتبقى احلى جبنه كريمى👍

🍗🍗- ادعكي الفراخ ببصلة وملح وفلفل قبل السلق عشان يبقى ليها طعم وريحة ومتبقاش زفرة .

☕☕- لما تشربي القهوة مترميش التفل ده سكرب هائل لبشرتك ادعكى به وشك وايدك .

🥔الملح لو زاد فى الطبيخ أو الشوربه حطى معاه بطاطسيه مقشره تغلى هتمتص الملح الزايد

🍵🍵- اكياس الشاي مترميهاش سقعيها وحطيها علي عينك للاجهاد والهالات السودا .

🍨🍨- الرز باللبن ضيفي له كيس كريم شانتيه هيخلى الطعم جامد .

🧅🧅- رشي دقيق علي بصل الكشري قبل التحميرعشان يكون مقرمش .

🍰🍰- سفن أب أو ميرندا نصيفها إلى عجينة الكيك بيخليها هشة وجميلة .

🍜🍜- رشة زعتر علي صلصة المكرونة بتدى ريحة حلو وطعم مميز .

- بيكنج بودر علي عجينة الكفته المشوية أو أى كفته ميخلهاش تكش .

🍋🍋- لفي الليمون في ورق جرائد عشان يحتفظ بلونة وميعفنش .

🍖🍖- تشوح اللحم في الزبد وحبهان وورق لورا قبل السلق نديها صدمة عشان يبقى لونها بنى وجميل وطعمها تحفه .

🍚🍚 - الأرز الأبيض شوحي مستكة وحبهان في السمن قبل الأرز هيدى ريحة حلوة للأرز .

🍜🍜 - لصلصة المكرونة اضربي مع الطماطم توم وفلفل رومي وفلفل حامي .

🍗🍗- إدهني الفراخ و البط بكاتشب وملح وفلفل قبل ما تحطيها فى الفرن هيخليها لونها حلو .

🍗- الكيس الحراري لتسوية الفراخ والبط .

- ضعى موتزريلا مع العصاج لحشو الجلاش .

🍚🍚- الأرز البسمتي اكشفي الغطا بعد ما يستوي عشان يبقى مفلفل ميعجنش .

- وأنتِ بتحمرى البانيه حطي ملعقة زبدة مع الزيت هيبقي حلو اوى وزي المطاعم
 

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
FB_IMG_1662103868725.jpg

عودى نفسك ❤❤❤

❤عودي نفسك دايما لما تشتري #طماطم وتسبيكي ابقي سبكي اتنين كيلو زيادة للطواري وحطيهم في الديب فريزر هينفعوكي في وقت ازمه...

❤دايما عودي نفسك تشيلي #اللحمه المفروم متعصجه 😀😀😀😅😅😅😅😅

❤عودي نفسك متشتريش #فيجيتار نشفي #الفينو الفايض منك واطحنيه وحطي عليه ببريكا توم بودر بصل بودر فلفل اسود شويه زعتر وشويه دقيق
هيبقا احلا من الفيجيتار الجاهز وهيوفر

❤عودي نفسك متشليش #البانيه غير وهو متبل مترمهوش كدة في الديب فريزر وخلاص وقسميه علي اد استعمالك

❤عودي نفسك تعملي تدبيله #السلطه وحطيه في ازازة في #التلاجه
حطي معلقه ملح ومعلقه كمون ربع معلقه فلفل اسود وحطي نص كوبايه خل ربع كوب #زيت نص كوب مايه وكل ماعملي #سلطه حطي عليها😘

❤ عودي. نفسك
#كفته #الرز لما تعمليها متشلهاش كدة لا حمريها الاول هتبقا اسهل لما تخرجيها

❤عودي نفسك لما تشتري #فراخ تبليها قبل متحطيها في الديب فريزر بصله صغيرة شويه فلفل اسود وادعكيها بيها لما تطلعيها تسلقيها هتبقا تحفه ولو شايلاها للشوي ابقي زودي #التتبيله شويه

❤عودى نفسك تتبلى #كفته و #برجر عشان لو جالك ضيف فجأه تتصرفى
 

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
نصائح مفيدة لمطبخك ❤️
١- عند سلق المكرونة، لا تتركيها تنضج تماما في الماء المغلي، بل اخرجيها قبل تمام النضج بدقيقتين لتكمل تسويتها فيما بعد مع الصوص ولا تزيد قابليتها للهرس.
٢- لتخليص الأيدي من رائحة الثوم، افركيها في حواف حوض المطبخ الستانلس ستيل لمدة ثلاثين ثانية ثم اغسليهم وراقبي كيف ستذهب الرائحة.
٣- يمكنك غمر أصابع البطاطس في الماء بعد تقطيعها لمنع إسمرارها في لحظات انتظار الزيت حتى يسخن.
٤- احفظي البهارات في مكان مظلم وبارد وليس بالقرب من البوتجاز حيث أن الحرارة وضوء الشمس يفقدان البهارات مذاقها مع مرور الوقت.
٥- عند الرغبة في إضافة مزيد من الزيت إلى مقلاة التحمير أثناء طهي الطعام، اسكبي الزيت بهدوء على حواف الطاسة لتكتسب سخونتها قبل الوصول إلى الطعام.
٦- عند تقطيع الأوراق الخضراء والأعشاب، انثري قليلا من الملح على لوح التقطيع أولا ليمنع الأوراق من التطاير.
٧- احرصي بعد تتبيل الدجاج أو اللحم على تركهم في الثلاجة لمدة لا تقل عن ساعتين حتى تمتص البهارات بشكل كامل ويصبح مذاقها أفضل بعد الطهي.
٨- لا تضعي الملح على السلطة إلا قبل تقديمها مباشرة للضيوف حتى لا تذبل سريعا بفعل الملح.
٩- قبل غلي الحليب، اغسلي القدر بالماء ثم اسكبي الحليب فيه دون تجفيفه، فهذا سيمنع الحليب من الالتصاق بالقدر ولن يصعب تنظيفه فيما بعد.
١٠- أعدي مرقة الدجاج بكميات كبيرة وخزنيها في أكياس أو عبوات بلاستيكية في الفريزر حتى يمكنك استخدامها فيما بعد في عمل وصفات الشوربة أو غيرها من الأكلات دون الإضطرار إلى سلق اللحوم.
١١- للتخلص من الرائحة الكريهة في الثلاجة، ضعي قطعة فحم أو كوب مملوء ببيكربونات الصوديوم في باب الثلاجة.
١٢- افردي ورق الزبدة في الصواني قبل خبز المعجنات عليها مثل الدونات أو الفطائر وذلك حتى يسهل غسلها فيما بعد. وعلى غرار ذلك، يمكنك استخدام ورق الفويل عند عمل المشويات.
١٣- لمنع الفواكه المقطعة من الإسمرار خاصة التي ستستخدمينها في عمل سلطة الفواكه، يمكنك عصر ثمرة ليمون عليها.
١٤- عند طهي القرنبيط، أضيفي قليلا من الحليب مع الملح إلى ماء السلق حتى يحافظ على بياضه الناصع.
١٥- قبل تشكيل عجين البيتزا أو الفطائر، انثري قليلا من الدقيق على يديك حتى لا تلتصق بها.
١٦- بمجرد فتح علبة الصلصة، اسكبي قليلا من الزيت على السطح حتى لا تفسد سريعا في الثلاجة.
١٧- لتجنب تدميع العينين أثناء تقطيع البصل، ينصح بتبريد البصل في الثلاجة لمدة عشرين دقيقة قبل تقطيعه، ويمكنك مضغ علكة أثناء التقطيع لتخفيف أثره أيضا.
١٨- قبل عصر الليمون، ادعكيه بين راحتي يديك قليلا أو سخنيه لمدة ١٠ ثوان في الميكروويف للحصول على أكبر كمية من العصير منه.
١٩- عند عمل الشاورما ، ابدأي بتحمير البصل والفلفل في البداية ثم أضيفي قطع الطماطم والمشروم في النهاية حيث أنهما ينضجان سريعا.
٢٠- لتنظيف الميكروويف، ضعي إناء مملوء بالماء ومضاف إليه عصير ليمون وشغلي الجهاز حتى يبدأ الماء في الغليان ثم نظفي الميكروويف بعد ذلك بقطعة مبللة
 

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
💥 البطاطا
اما تشوي البطاطا في الفرن خرميها كتيير بالشوكة علشان بتنزل العسل اللي جواها
وجربي كده اخرمي واحدة وواحدة لا وهتشوفي الفرق في الطعم
اللي بتكون مخرمة اكييد طعمها هيكون احلى 👌

💥 الفانيليا :
يا سلام عليها لو ضيفناها على اي حاجة بتخليها خيال
على العصاير خصوصا لو اي حاجة فيها لبن
بلح _ جوافة _ موز اي عصير هتحسي طعمه زي اللي بتشربيه في احلى الكافيهات
وعلى عجينة البيتزا طعمها بتكون ولا بيتزا هت
وممكن نضيفها على الفيشار كمان
مش بقولكوا الفانيليا دي حاجة تحفة 👌

💥 السمن
اماتسيحي السمن ضيفله ورق لورى وحبهان
بيديله ريحة حلوة اوي ويتخزن لمدة سنة بنفس الريحة 👌

💥 الكشري
صلصة الكشري بعد ما تعمليها اعملي عليها طشة توومة بكزبرة كتيير بتفرق في طعم الكشري كله
وده سر من اسرار كشري ابو طارق 👌

💥اللبن
اما تشتري اللبن وتحسي او تشكي انه ممكن يكون رايب
او هيروب وهو بيغلي اول ماتحطيه عالنار ضيفيله معلقة بيكنج بودر كبيرة وقلبيها فيه
ان شاء الله مش هيروب خالص👌

💥 الخضروات
حفظ الخضروات الورقية زي الشبت والبقدونس والجرجير اغسليهم ونشفيهم في فوطة نظيفة بس مش يكون فيه نقطة مية واحدة ولفيهم في ورق ابيض نظيف مش كيس علشان الكيس بيعمل بخار مية وينزل عالخضار يسوده ويبوظه 👌

💥 بواقي الكيك
لو عندك بواقي كيك فتتيه واعمله تورتة جيلي
في قالب اعملي جيلي واما يجمد فتتي عليه نص الكيك وبعدها طبقة كريم شانتي وبعد كده باقي فتافيت الكيك وصبي باقي الجيلي و سيبه يبرد في التلاجة تانى👌

💥 الملوخيه
الملوخية ضيفلها كزبرة خضرا وتتخرط معاها بتكون لذيذة اوي👌

💥 تخزين الخضار والفواكه
اما تخزني خضار او فاكهة في الفريزر ما تنسيش تخرجي الهوا اللي في الكيس علشان الحاجة اللي جوا ما تسودش وتفضل محتفظة بلونها👌

💥 اكلة موفرة
لو عاوزة تعملي اكلة شكلها شيك وموفرة في نفس الوقت ممكن تعملي الشيش طاووق بس بدل الفراخ تحطي بطاطس مكعبات وطعمها يجنن وشكلها جمييل👌

💥 فكرة
لو عندك بواقي رز ممكن تضيفي عليه بيضة وبهارات وتعمليها في الكبة تكوريها زي الكبيبة وتفتحيها من النص وتحشيها جبنة بزيتون وفلفل وتقليها في زيت👌

💥
لو السويسرول اتكسر او اتفتت منك وانتي بتلفيه اعمليه تورتة مستطيلة اقسميها اتنين بالطول واعمليها زي ما بتعملي التورتة عادي احشيها كريم شانتي من النص وضيفي النص التاني وزوقيها على زوقك انا عملت معايا كده وقلبتها تورتة👌

💥
لو هتعملي رز بالخلطة ومكسلة تعملي الكراميل ضيفله معلقتين عسل اسود طعمه بيكون حلو اوي بجد👌

💥آآآخر حاااجة
لما تعملي شوربة لسان عصفور حمريها واغليها غلوة وسيبها فى الشوربة شوية حتبقي مستوية 👌❤️❤️
 

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
الغسالة الاتوماتيك ليه مش بتنضف ؟؟؟
وايه الاضافات اللى نزودها على المسحوق علشان غسلنا يبقا فله ؟؟؟
سؤال محير الكتير. ...تعالو نشوف ها نعمل إيه🌹🌹🌹
1_الابيض:
نضيف معلقتين ملح ليمون وربع كوباية خل حدهيسال ميبوظش الغسالة ارد طبعا لا انتى اماتحتاجى تنضفيها بتعملى دورة خل علشان تنضف ويسلام لو بشرنا صابونه صن لايت وضيفنا شوية بشر مع المسحوق اى كان نوع المسحوق الاضافات دى بتلمعه🌹🌹🌹
2_الزهرة :
الزهرة السايلة غليت اوى بس بجد بتفرق كتير فى الابيض طيب نعمل ايه هنعملها بنفسنا ومش هتكلفك غير اتنين جنيه ممكن يكفوكى شهور ازاى
2جنيه زهرة من بتاع المنظفات هناخد ملعقة كبيرة على كوباية ماية وعلشان ميلطشش معلقتين برسيل جل نقلب جيدا ونضعها فى زجاجة نرج كويس قبل الاستخدام وناخد نص غطا نحطه بعد منشغل الغساله زى الكلور مش فى البداية بتزهزه الهدوم البيضة والله والملونه بتخلى الوانها مزهزها🌹🌹🌹
3_الملابس الملونه:
شوية خل ومعلقة كربوناته بيثبت الالوان ويزيل اى بقع
ملحوظه:انا بضيف المسحوق فى الغسالة مباشرتا مش فى الدرج والحمد لله تمام الغسيل زى الفل
ولو غسيللك الابيض مش نضيف شغلى السخن وشغلى الغسالة فى نص الغسله افصلى الغسالة مثلا من بليل للصبح يفضل منقوع فيها وكملى الغسله الصبح هينور مع الاضافات

🌹🌹🌹🌹🌹🌹🌹🌹🌹🌹

 

yasma

Moderator
إنضم
نوفمبر 16, 2021
المشاركات
1,984
مستوى التفاعل
102
نصائح_اتنظيف
منتجات أساسية لإزالة البقع في المنزل
الماء
لازاله بقع الشاى والقهوه والكاكاو والشوكولاته وخاصه الماء الساخن مع الخل إن كانت قديمه
البنزين_والكحول
يستطيع البنزين والكحول إزالة بقع الشمع والحبر وكذلك الزيوت والشحوم
الليمون_والخل_الابيض_او_خل_التفاح
لإزالة بقع الصدأ والزيوت وبقع الفواكه الصعبة مثل بقع الرمان والتوت والكرز
النشادر
لإزالة بقع واصفرار الملابس من العرق
البيكربونات
ويعتبر مسحوق رائع له العديد من الاستخدامات، لكن من استخداماته لإزالة البقع أنه قادر على إزالة بقع الشاي والمشروبات من الأكواب
أما البقع على الأنسجة المختلفة فهو قادر على إزالة بقع الحليب والبيض ورائحتهما من الملابس أو السجاجيد. ومناسب لتبييض الملابس البيضاء.
الملح
وهو من أروع المواد أيضًا لأنه كما البيكربونات له العديد من الاستخدامات منها تنظيف الأواني النحاسية والخوص وغيرها
يمكن استخدام الملح لإزالة بقع الشحم على الملابس والسجاد بوضعه عليه لمدة ثم فركه. وهو قادر على إزالة البقع الصعبة مثل الكركديه والرمان والعنب والكريز
والملح رائع أيضًا لإزالة بقع العرق والاصفرار على الملابس البيضاء أو ذلك البياض على الملابس الداكنة، وهو مناسب لإزالة بقع الدم إن كنت طبيبة أو فنية معمل أو إن تعرضت لإصابة أو غيرها، وهو يعتبر أيضًا من المواد الجيدة لإزالة بقع الصدأ مع استخدام الليمون أيضًا من الملابس أو غيرها.
ويمكن استخدام الملح والبيكربونات في إزالة البقع من على الرخام والطاولات وغسالة الملابس والأطباق والثلاجة وكذلك إزالة الرائحة الكريهة منها
وبس كدا
منتجات أساسية لإزالة البقع في المنزل
الماء
لازاله بقع الشاى والقهوه والكاكاو والشوكولاته وخاصه الماء الساخن مع الخل إن كانت قديمه
البنزين_والكحول
يستطيع البنزين والكحول إزالة بقع الشمع والحبر وكذلك الزيوت والشحوم
الليمون_والخل_الابيض_او_خل_التفاح
لإزالة بقع الصدأ والزيوت وبقع الفواكه الصعبة مثل بقع الرمان والتوت والكرز
النشادر
لإزالة بقع واصفرار الملابس من العرق
البيكربونات
ويعتبر مسحوق رائع له العديد من الاستخدامات، لكن من استخداماته لإزالة البقع أنه قادر على إزالة بقع الشاي والمشروبات من الأكواب
أما البقع على الأنسجة المختلفة فهو قادر على إزالة بقع الحليب والبيض ورائحتهما من الملابس أو السجاجيد. ومناسب لتبييض الملابس البيضاء.
الملح
وهو من أروع المواد أيضًا لأنه كما البيكربونات له العديد من الاستخدامات منها تنظيف الأواني النحاسية والخوص وغيرها
يمكن استخدام الملح لإزالة بقع الشحم على الملابس والسجاد بوضعه عليه لمدة ثم فركه. وهو قادر على إزالة البقع الصعبة مثل الكركديه والرمان والعنب والكريز
والملح رائع أيضًا لإزالة بقع العرق والاصفرار على الملابس البيضاء أو ذلك البياض على الملابس الداكنة، وهو مناسب لإزالة بقع الدم إن كنت طبيبة أو فنية معمل أو إن تعرضت لإصابة أو غيرها، وهو يعتبر أيضًا من المواد الجيدة لإزالة بقع الصدأ مع استخدام الليمون أيضًا من الملابس أو غيرها.
ويمكن استخدام الملح والبيكربونات في إزالة البقع من على الرخام والطاولات وغسالة الملابس والأطباق والثلاجة وكذلك إزالة الرائحة الكريهة منها
 
أعلى أسفل
}